KALIBO, Aklan—Magiging mabahoe nga sab-eag sa kasong ginapangatubang makaron ni dating presidente Rodrigo Duterte sa International Criminal Court hay ro kawad-an it preno sa anang mga ginpaguwa nga pahayag dati .
Suno kay Atty. Jude Mangilog, secretary it integrated bar of the Philippines ukon IBP Aklan Chapter ag sangka law professor nga ro sangka mabahoe nga ebidensiya nga kinahangean nga sabton it anang defense team hay ro direktang pagturo kana it anang mga dating tawuhan sa ginpatigayon nga hearing it house of representatives nga may kahilabtanan ro dating presidente sa mga natabu nga paeatyan sa ginlunsar kara nga war on drugs .
Gindugang pa ni Atty Mangilog nga nakadepende sa bug-at it ebidensiya ag presentasyon ukon kalidad it mga saksi nga pagadaehon ro igabuhay it trial it anang kaso sa ICC rason nga ginapanan-aw nga posibleng mag-abot it hasta sa waeo hasta napueong dag-on.
Nauna kara, nag apela ro defense team ni Duterte sa ICC Pre-Trial Chamber angot sa admission process sa mga biktimang magatau it testimonya angot sa kasong crimes against humanity agud nga indi eon maghinay ro proseso it pagbista ag maitau ro kinamatarung it dating Pangueo sa “speedy judicial process.”
