KALIBO, Aklan–Nakataeana nga magpatigayun it political forum ro Kapisanan ng mga Brodkasters ng Pilipinas (KBP)-Aklan Chapter para sa mga kandidato nga nagapadaeagan sa provincial level sa Abril 29, 2022.
Suno kay Mr. Apolonio Zaraspe, Chairman it KBP-Aklan Chapter nga nagpatigayun sanda it konsultasyon sa tanan nga miyembro kung siin gindesisyon nga maghiwat it political forum/debate para sa mga nagapadaeagan sa pagka-kongresista, gobernador ag bise gobernandor sa Eastern ag Western side it probinsya.
Ro mga panelist sigon ro magapangutana sa mga kandidato ag magabuoe man sanda it pangutana online.
Samtang, ro mga kandidato sa pagka-Board member hay pagataw-an it tig-tatlong minuto para magpakilaea ag magpaathag it andang plataporma de gobyerno.
Nagpadaea eon man sigon sanda it imbitasyon sa mga natungdan nga personalidad.
Ro forum sigon hay pagahiwaton sa sueod it sang adlaw nga maga-umpisa it alas-3:00 it hapon.
Raya sigon ro tyempo para maipakilaea it mga kandidato ro andang kaugalingon ag maiplastar ro plano para sa bilog nga probinsya it Aklan.
Gin-engganyo man kara ro mga kandidato nga kalitan ro kahigayunan para mas maabu pang makabati ag makapamantaw it andang mga plataporma.
