Kalibo Aklan ——Maga-operate eon it uman ro Kalibo International Airport umpisa sa July 1, 2020.
Raya hay sandig sa Executive Order number 28 series of 2020 nga ginpaguwa ni Aklan Governor Florencio Miraflores.
Apang, ro domestic flights hay intended eamang para sa mga returning Overseas Filipino Workers (ROF’s) ag Locally Stranded Individual (LSI’s).
Nakabaehag dugang sa EO it gobernador nga daywang ka flights per airline sa sueod it sang dominggo ro ginapasugtan nga makabyahe sa KIA.
Ro mga magasueod sa probinsya it Aklan hay kinahang-ean nga makasikyar it medical certificate nga gina-isyu it government physician, travel authority nga gina-isyu it Philippine National Police (PNP) ag Health Declaration Card nga ginapresenta sa mga natungdan nga otoridad sa pag-abot sa paeoparan.
Hugot nga igapatuman ro “no health declaration card no exit” halin sa arrival terminal.
Ro health declaration form hay pwede nga maaccessed sa Aklan Province’s official website nga http://aklan.gov.ph/.
May kaangtanan kara, ginpahayag ni Civil Aviation Authority of the Philippines (CAAP) Aklan manager Engr. Eusebio Monserate Jr. nga haom eon sanda sa resumption it domestic flights.
Suno kana, makapilang beses sanda nga nagpatigayon it simulation exercises agud nga maging maayos ro andang pagbaton it mga biyahero sa tunga it nagapadayon nga pandemya.
