Puro pabalik eon lang sa Incheon South Korea ro mga international flights nga gina-cater makaron it Kalibo Internatinal Airport.
Suno kay Engr. Eusebio Monserate, Jr., Manager it Civil Aviation Authority of the Philippines ukon CAAP-aklan nga tuyo kara nga mahakot eon paguwa it probinsiya ro mga Koreano nga nakasueod sa probinsiya antes pa man ro ginpatuman nga community quarantine ni Governor Florencio Miraflores .
Ginpahayag ni Engr. Monserate nga nakabaehag sa gin-amyendahan nga Executive Order No. 19 ni Governor Miraflores nga bawae anay nga makasueod sa aklan ro mga dumueuong nga naghalin sa nasyon nga may nailistang kaso it coronavirus disease (COVID-19).
Umpisa kahapon Marso 17 hasta 19 hay maga-eupad sa airport ro international flight paagto sa South Korea.
Nasayuran nga bandang alas-10:30 kahapon it agahon hay kapin sa 50 nga mga pasaherong Koreano ro nagbalik eon sa andang nasyon nga kaeabanan hay nagbakasyon sa Boracay ag Iloilo.
Sapihak nga parte, ginkumpirma dugang ni Monserate nga kanselado eon ro domestic flight sa paeuparan epektibo kahapon , marso 17.
Epektibo makaron nga adlaw it miyerkules hay owa eon it anuman nga regular flights nga magatugpa sa Kalibo airport mag-eowas sa eroplano nga magahakot it mga koreano pabalik sa sokor .
Samtang, aminado man si Engr Monserate nga ko nagtaliwan nga mga inadlaw nga may mga flights pa sa paeuparan, apang gina-hold nanda ro mga bukon it Aklanon ag ginabalik sa andang point of origin.
Ro ulihing international flight hay ko domingo it agahon halin sa Incheon South Korea .
Kat makaangkon sigon it local transmissions hay mas pa sanda nga naghugut sa paeuparan , kun sa siin, may separado nga lane ro mga aklanon ag Non-Aklanon passengers kamana man nga padayun sa gihapon ro pag-check sa body temperatures gamit ro handheld thermal scanners.
