KALIBO, Aklan–Makabig nga seryosong alegasyon ro kidnapping ag rape rason nga kinahangean nga mapamatud-an.
Raya ro ginpahayag ni Atty. Plaridel Morania, sangka batikang abogado sa aklan angot sa kasong paghimueos sa sangka 15 anyos nga dalagita it gina-alegar nga naka-inuman kara nga 19 anyos sa parte it Libertad ag nasundan sa ikaywang kahigayunan sa Pandan sa Antique.
Ginpahayag ni Atty. Morania nga indi eon kinahangean makaron nga pamatud-an it sangka biktima it pagpanghimueos nga nagsukoe imaw agud nga mahambae nga may natabu nga krimen.
Ro krimen sigon nga rape makaron hay makabig nga crime against person ag bukon eon it crime against chasity.
Raya hay may sentensiyang ‘reclusion perpetua’ ukon pagkakulong nga halin 20 hasta 40 anyos.
Kinahangean suno kay Atty. Morania nga may nagakaigo nga imbestigasyon ro pulisya ag doktor nga nag-examine sa biktima agud nga mapursige ro kaso sa nagakaigo nga korte.
Samtang, gindugang pa ni Atty. Morania nga sa edad sigon it biktima nga 15 hay owa pa kara nasayuran ro anang gina-obra.
Bangud kara, importante para sa mga ginikanan nga mabanyan it husto ro andang mga unga eabi eon ro mga kababayin-an agud nga makalikaw sa kapahamakan.
