KALIBO, Aklan—Ginpasarado it Department of Environment and Natural Resources (DENR) ro sangka kilaea ag magueang nga resort sa isla it Boracay.
Base sa ginpaguwang statement it ahensya, nakitaan sigon raya it pag-eabag sa environmental laws and regulations sa nagapadayon nga rehabilitation effort sa isla.
May kaangtanan kara, gindihon it Boracay Interagency Task Force sa Boracay Plaza Beach Resort nga makit-an sa Station 1, Barangay Balabag ro closure order bangud nag-eampas ro andang construction sa gintaeanang road easement limits ag naga-operate nga paso ro mga nagakaigong permits ag clearances.
Una kara, gin-isyuhan it demolition order ko Abril 2018 ro nasambitang establisyimento kasunod it pagpasarado sa isla para sa an-om nga bueang rehabilitation bangud sa pag-eabag kara sa required coastal and road easements.
Nasayuran nga raya ro unang establisyimentong ginpasarado it gobyerno halin kat buksan it uman sa publiko ro isla ko Oktubre 2018.
Samtang, uwa sa presenteng listahan it Department of Tourism (DoT) it mga ginapasugtang resort and hotels nga pwedeng mag-operate sa isla ro Boracay Plaza Beach Resort, sambilog sa mga pinakaunang resorts nga nagbukas ko 1980’s.
