KALIBO, Aklan—Ginsuhestiyon it batikang abogado sa Aklan nga bangud sa nagahilapit nga eleksyon, kinahangean nga kilaeahon it husto ro pagkatawo it igaboto.
Suno kay Atty. Plaridel Morania nga importante nga mahimo naton it mayad ro atong papel bilang mga botante.
Sa makaron pa eamang suno kana hay kinahangean nga pag-isipan ag ipangamuyo ro aton nga pagpili bangud nga nakasandig kara ro paaeabuton it atong nasyon ag ulihing henerasyon.
Gindugang pa ni Atty. Morania nga importanteng usisaon ro ikasarang it mga kandidato nga magdumaea kamana man ro andang moralidad ag character.
Sayuron man sigon ro andang panan-awan ag mga plano para sa nasyon engkaso nga mataw-an it kahigayunan nga makapanerbisyo dugang pa ro andang plata-porma.
Kinahangean suno kana nga maging responsabli ag pili-on it husto ro igaboto ag indi magpadaea-daea sa iba.
