KALIBO, Aklan — Naging matawhay sa pangkabilugan ro ginpatigayon nga anti-corruption rally ag napabilin ro kalinong ag kaeowasan it publiko base sa initial assessment it Aklan Police Provincial Office (APPO).
Suno kay P/Capt. Aubrey Ayon, tagapaghambae it Aklan PPO nga owa sanda it nailistang untoward incident sa tatlong banwa nga ginhiwatan it prayer ag protesta rally kamana man ro ginpatigayon nga fun run.
Mabahoe suno kana ro pagpasaeamat ni provincial director P/Col. Arnel Ramos ag iba pang kapulisan sa matawhay nga pagpabutyag it kaakig it mga raliyista kontra sa maeapnagon nga korapsyon sa nasyon.
Raya hay naghalin sa mga banwa it Kalibo, New Washington ag Isla it Boracay sa banwa it Malay.
Sa pihak kara, ginpahayag ni Ayon nga nasubuan sanda sa gindangatan it pilang kapulisan sa Metro Manila nga nag-angkon it mga kasamaran sa eawas sa pagtinguha nga mapugngan ro mga nagtuhaw nga kinagamo nga ginakabig nga isolated case eamang.
Ginpamilit it opisyal nga sa pihak it mga insidente, ginpatuman gihapon it kapulisan ro maximum tolerance.
P/Capt. Aubrey Ayon, tagapaghambae it Aklan PPO
