KALIBO, Aklan—Uman nga nagpanindugan ro pamunuan it Kilosan Kontra Crematorium (KKC) sa bahin it Brgy. Badio, Numancia nga hugut nandang ginabaeabagan ro pagpatindog it crematorium facility sa bisinidad it Badio Municipal Cemetery.
Suno kay Mrs. Lucy Hindrana, presidente it Kilosan kontra Crematorium nga ginpakamayad nandang magpa-rehistro sa Securities and Exchange Commission (SEC) para mapabakod ro katuyuan it andang grupo.
Sa makaron hay ginahueat eon lang nanda ro resulta matapos nga ma-comply ro pila sa mga ginakinahang-ean nga requirements it komisyon.
Ro Kilosan Kontra Crematorium hay ginabilog it kapin sa 707 nga mga pumueoyo maghalin sa pilang kabarangayan nga maeapit sa Barangay Badio, Numancia.
Tuyo eamang kara nga mabaeabagan ro konstruksyon it crematorium sa andang lugar.
Nagakabaeaka sigon sanda sa maeain kara nga epektibo sa palibot ag kaeawasan it mga residente.
Sa pag-istorya ni Hindrana, haeos sang dominggo eon nga owa it naga-ubra sa pasilidad.
Apang, owa sigon sanda nagapakampante sa baylo hay padayun gihapon ro andang paghueag nga indi raya madayon.
