KALIBO, Aklan—Ginkondena it grupo it Kilusan Kontra Crematorium ro operasyon it ginpatindog nga crematorium facility sa bahin it Badio Municipal Cemetery sa banwa it Numancia.
Suno kay Mrs. Lucy Hindrana, Presidente it Kilusan Kontra Crematorium nga eubos nanda nga ginakasubo ro pagpasugot it mga natungdan nga ahensya it gobyerno sa operasyon it pasilidad apisar nga maabu nga pumueoyo ro naghimo it petisyon.
Nagapati sigon sanda nga may anomaliya nga natabo rason nga madasig nga gin-aprubahan ro konstruksyon it pasilidad.
Enero 12 kat nag-umpisa sigon nga magbaton it kliyente ro nasambit nga crematorium.
Ginkadismayad man it grupo ro owa kanda pag-imbita sa ginpatigayun nga pueong it Department of the Interior and Local Government (DILG) kaibahan ro lokal nga gobyerno.
Nag-apela man raya nga kunta hay mataw-an sanda it kahigayunan nga maipaabot ro andang sentimiyento angot sa proyekto bangud ro andang ikaayong eawas ro ginasakripisyo.
