KALIBO, Aklan—Makaangkon it nagkaeain-eain nga aktibidad ro Kilusang Mambubukid ng Pilipinas antes pa man ro nakataeana nga State of the Nation Address ni Pangueong Ferdinand Marcos Jr. sa adlaw it Lunes, Hulyo 22.
Suno sa presidente it grupo nga si Danilo Ramos, ro andang aktibidad nga pagahimuon hay pagatambungan it nagkaeain-eain nga sektor agud nga ipanawagan ro reporma sa eogta bangud nga uwa it naging pagbag-o sa Pilipinas halin kat nagpungko si Marcos Jr. bilang presidente.
Gin-insister ni Ramos nga sa sueod it daywang dag-on nga pagpanerbisyo it administrasyong Marcos hay mas pang nag grabe ro krisis sa pagkaon, agrikultura ag mas naglobo ro utang it Pilipinas.
Ginakwestyon sigon nanda makaron kon anu ro naging basehan it ginapahayag nga Bagong Pilipinas bangud nga mismong ro andang grupo nga una sa sektor it agrikultura hay uwa it nakit-an ag nabatyagan nga pagbag-o.
Suno pa kana nga uwa gid nataw-an it solusyon it administrasyong Marcos ro problema it mga mangunguma sa baylo, kapin pa raya nga naglala bangud sa kawad-an it andang kita nga raya kunta ro ginprayoridad base eon man sa anang naging campaign promise.
