Maabu eon nga natabu nga kinagamo nga ro gingamit hay baril.
Maabu eon ro nauyang nga kabuhi bangud kara.
Sa United States eamang, maabu eon ro namatay kat paueanan it bala.
Sunud-sunod ro mga pagpatay idtu nga ro gingamit hay baril.
Maeumo ro pagpanag-iya it baril sa U.S. rason nga ordinaryo eon lang nga may basta-bastang nagapamaril.
Makaron nga dag-on, maabu ro shooting incident nga kaeabanan nga natabu hay sa mga eskwelahan.
Ko nagtaliwan nga buean, sangka abogadong Pinoy nga nagabisita eamang sa U.S. ro ginbaril ag napatay.
Sin-o ro magaeaum nga ro pagpamaril s a US hay matabu man sa Pilipinas ag natabu pa sa sueod it sangka kilaeang unibersidad.
Sa unang kahigayunan hay may napatay sa unibersidad gamit ro baril.// tatlo ro napatay ag daywa ro naninahan.
Ro mga napatay hay si dating Lamitan City, Basilan mayor Rose Furigay, anang aide nga si Victor George Capistrano ag ro Ateneo security guard nga si Jeneven Bandiola.
Naninahan man ro unga nga babaye ni Furigay ag sambilog pang babaye.
Natabu ro pagpamaril ko domingo , adlaw it graduation sa Ateneo de Manila Law school sa Quezon City.
Ro nagpangbaril hay si Chao Tiao Yumol, sangka doktor.
Nakasueod sa unibersidad si Yumol samtang nakasakay sa transport network vehicle.
Gin-abangan kara si Furigay nga kato hay magatambong kunta sa graduation it unga.
Suno sa kampo it mga Furigay, may grabeng kaakig si Yumol sa dating mayor nga nag-umpisa pa ko 2018.
Nagpatindog it clinic si Yumol sa Lamitan apang owa it permit rason nga ginpasarado ni Furigay sa order man it Bangsamoro Autonomous Region in Muslim Mindanao.
Umpisa kato, nag-post eon sa social media si Yumol it mga maeain nga pasibangud kontra kay Furigay.
Ginpasakaan imaw ni Furigay it 70 nga cyberlibel complaints.
Matapos ro pagpamaril, nagpaeagiw si Yumol.
Ginsakyan ro sangka kotse paagto sa Aurora Boulevard apang gin-abandona nana raya ag nagsakay it sangka bus paagto sa Marikina apang naeagas imaw it mga pulis ag publiko ag nadakpan.
Daywang baril ro nabawi kana.
Sa televised interview gin-akusahan ni Yumol si Furigay ag asawang si Roderick, ro presenteng mayor it Basilan nga eakot sa drug trafficking.
Ro natabu hay nagapadumdum sa mga awtoridad nga dapat nga mag-instrikto sa pagtau it permit agud nga makapanag-iya it baril.// Isyu man ro seguridad sa hitabu.
Nakasueod si Yumol sa unibersidad nga may daeang daywang baril nga owa eon nag-agi sa pag-usisa.
