KALIBO, Aklan—Sa atubang it nagapadayun nga kinagamo sa tunga it Russia ag Ukraine, ginpaathag ni Bombo International Correspondent Pinoy Gonzales it Texas, USA kon siin nag-umpisa ro banggi-anay it daywang nasambit nga nasyon
Suno kana nga nag-alburuto si Russian President Vladimir Putin bangud sa alegasyon nga owa imaw ginapamatian sa anang gusto nga indi paintrahon ro Ukraine sa North Atlantic Treaty Organization ukon NATO ag panawagan punduhon eon ro eastward expansion it NATO maeapit sa andang border bangud nga paeag sigon raya sa andang seguridad.
Gindugang pa ni Gonzales nga ro 2014 hay nakaangkon man it gulo sa magtimbang nga parte kat sakupon it Russia ro Autonomous Republic of Crimea nga kaparte kato it Ukraine.
Ginsuhestiyon eon sigon ko una it Russia nga magpasakop sa NATO, apang nagpanindugan ro Amerika ag iba pang miyembro nga indi pagbatunon ro dating Soviet Union nations.
Samtang, gin-armasan eon makaron it Ukraine maskin ro andang mga sibilyan agud nga magsukoe kontra sa Russia.
Samtang, nagapasi si Gonzales nga indi masyadong maapektuhan ro Russia sa igapatong nga economic sanctions bangud nga sanda ro naga-supply it haeos 50% it natural gas sa bilog nga Europa nga naga-agi sa pipeline.
Kaeabanan man sigon nga nagahalin sa Russia ro crude oil ag mga abono nga gina-supply sa bilog nga kalibutan eakip ro Pilipinas rason nga grabe ro pagmahae kara makaron.
Samtang, imposible man suno kana nga mag-atras pa ro Russia.
Igaduso sigon kara ro kagustuhan nga eubusan eon nga sakupon ro Ukraine.
Sa pihak nga parte, matsa naga-isog man suno kana ro buot makaron nga China nga minatud-on ro pagbawi sa Taiwan bangud sa kawad-an it reaksyon it US sa gulo sa Russia ag Ukraine.
