KALIBO, Aklan—Magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka eaeaking kite boarding instructor kasunod it ginpatigayun nga drug buy-bust operation it Malay PNP sa isla it Boracay.
Base sa report, nakilaea ro suspek nga si Ryan Roy Jordan, 35-anyos, tumandok it Negros Occidental apang presenteng naga-istar sa Sitio Bolabog, Brgy. Balabag sa nasambit nga isla.
Narekober sa posisyon ag kontrol it suspek ro daywang plastic sachet it ginapatihan nga shabu kabaylo it 1, 200 pesos nga buy-bust money.
Sa ginpatigayun nga body search kay Jorda, narekober dugang sa posisyon kara ro an-om pang plastic sachet it shabu nga nakabutang sa kaha it sigarilyo.
Samtang, depensa man it suspek nga owa sigon imaw nagagamit ukon nagabaligya kamana man nga bukon sigon it ana ro mga nabuoe nga illegal nga droga.
Sa makaron hay nakakulong eon sa Malay Police Station ro nasambitang suspek para sa nagakaigo nga disposisyon.
