KALIBO, Aklan—Kanselado ro klase sa pampubliko ag pribadong eskwelahan sa Milan, Italy kasunod it pagkalhit it coronavirus disease ukon COVID-19.
Raya hay suno kay Bombo International Correspondent Armie Esparcia, tubong Brgy. Mataphao, New Washington apang presenteng nagatrabaho bilang overseas Filipino worker sa nasambitang nasyon.
Suno kana, halin kat nagkalhit ro virus sa nasyon hay gin-obliga sanda nga pasuksukon it mask ag maggamit it alcohol kada magsueod sa trabaho ag mga establisyimento.
Ginpahayag dugang nga nabawasan ro oras it pagtrabaho it mga empleyado bangud kinahang-ean it mga raya nga makauli it temprano agud nga inde makipagdueotdutan sa mga terminal ag bus.
Nagakaubusan eon sigon it facemask ag hand sanitizer sa mga pharmacy bangud sa pag panic buying it mga pumueoyo.
Apang sa pihak kara, nagapadayon ro pagkayod it mga OFW bangud nga nagapabilin nga normal ro tanan para kanda.
Ro importante sigon hay ginasunod nanda ro panugyan it Italian government agud nga inde matapnan it makamaeatay nga virus.
