KALIBO, Aklan—Balik eon sa normal ro klase sa mga eskwelahan nga maeapit sa Governor Corazon Legaspi-Cabagnot Memorial Training Center sa Brgy. Old Buswang, Kalibo, Aklan.
Ginbueo ni Kalibo Mayor Emerson Lachica ro suspension it klase sa tanan nga level sa mga pampubliko ag pribadong eskwelahan matapos nga makabalik ko adlaw it Biyernes, Enero 31 sa China via Chengdu sakay it China Eastern Airlines ro 11 Chinese tourist nga ginpaidaeom sa quarantine bangud sa posibilidad nga exposure it mga raya sa Novel Coronavirus acute respiratory disease.
Ro nasambitang mga eskwelahan hay ro Regional Science High School for Region VI, Saint Gabriel College, Buswang Old-Bachao Sur Elementary School ag Starglow Center for Academic and Arts.
Gusto pa kunta it mga dumueoong nga ginakaeakipan it pitong adult ag ap-at nga onga nga ma-extend ro andang pagpabalin sa Aklan ag inde anay magbalik sa China sa kahadlok sa sakit nga 2019 N-CoV.
Sang dominggo sandang na-quarantine bangud sa pag-angkon it close contact sa sangka nagpositibo sa nasambitang respiratory virus sa Hong Kong.
