Kalibo Aklan——– Suspendido eon ro klase sa pribado ag pampublikong eskwelahan sa tanan nga lebel umpisa makaron nga adlaw it Lunes, Marso 16 hasta sa Abril 15 it presenteng dag-on sa bilog nga probinsya it Aklan.
Raya hay sandig sa Executive Order No. 019 series of 2020 nga ginpaguwa ag ginpirmahan ni Aklan Governor Florencio Miraflores kon sa siin ginamanduan ro tanan nga magpaidaeom sa community quarantine.
Ro desisyon it gobyerno probinsyal hay kasunod it nagatinaas nga kaso it mga nagpositibo sa 2019 coronavirus disease ukon COVID-19 partikular sa Metro Manila nga ro iba hay nailista pinaagi sa local transmission.
May kaangtanan kara, ginabawaean ro pagsueod it mga indibidwal sa probinsya mas kapin pa kon halin ro mga raya sa infected nga lugar pinaagi sa air and sea travel rason nga makaangkon it hightened alert sa tanan nga sea ports ag airports.
Ginklaro it gobernador nga uwa it restriction sa travel by land basta sundon eamang ro mga protocols.
Gin-insister man kara nga bukon it lockdown ro anang ginapatuman kundi community quarantine eamang agud nga padayon nga malikawan it mga pumueoyo ro makamaeatay nga sakit.
Samtang sa pihak nga parte, ginlaygayan ni Gov. Miraflores ro mga pumueoyo nga inde magpanic buying.
Ginpasiguro kara sa publiko nga may bastanteng supply sa pagkaon ro probinsya ag iba pang kinahang-eanon it mga pumueoyo mag-eowas eon lang sa alcohol ag face mask.
Kinahang-ean eamang sigon nga magrelax ro tanan ag sundon ro mga panugyan it health authorities agud nga makalikaw sa deadly virus.
Ginpasiguro dugang kara nga nagapabilin nga eowas ro bilog nga probinsya it Aklan sa COVID-19.
