KALIBO, Aklan — Personal nga nagreklamo sa Kalibo Police Station ro sangka 19-anyos nga kolehiyala matapos gina-alegar nga ginlingling it anang ka-board mate sa Purok 3 C. Laserna Street, Kalibo.
Suno sa tagreklamo, kakaabot eamang nana halin sa eskwelahan kon siin sa anang pagsueod sa kwarto hay may nabatian imaw nga kaeoskos halin sa pihak nga kwarto nga gina-okupa it ginatumod nga suspek nga si Myron Racan ag residente it Brgy. Cabugao, Batan.
Bangud kara, ginpakamayad nana nga ginpaeong ro iwag ag dikara nadiskubrehan ro maisot nga buho nga posibleng gin-obra it suspek agud nga malingling imaw.
May kaangtanan kara, anang ginkompronta ro suspek kaibahan ro land lady nga mismong tiya ni Racan apang todo pamalibad raya ag ginhibaygan pa imaw.
Bangud kara, anang ginpakamayad eon lang nga ireklamo sa taeatapan it pulisya para sa nagakaigong disposisyon.
