KALIBO, Aklan—Dead on arrival sa Aklan Provincial Hospital ro sangka motorcycle rider matapos imaw nga barilon it owa pa matumod nga riding-in-tandem sa national highway nga sakop it Barangay Caano, Kalibo, agahon it Martes, Marso 12, 2024.
Nakilaea ro biktima nga si Juluis Cuesta, 31-anyos, collector it sangka motorcycle dealer ag residente it Barangay Tambak, New Washington.
Base sa inisyal nga imbestigasyon, nakaangkon it igo it bala sa ueo ro biktima kun sa siin napaeos ro anang suksok nga helmet nga kulay mint green.
Nakapaeagiw ro owa nakilaea nga mga suspek nga nakasakay man sa sangka motorsiklo.
Natabu ro insidente bandang alas-8:00 kaina it agahon sa nasambit nga lugar maeapit sa ginakabig nga hunted house.
Suno sa pilang testigo nga nakabati sanda it sangka eupok it baril ag pagkatapos hay nakita nga natumba nga duguan ro biktima halin sa anang ginasakyan nga motorsiklo nga baja nga kulay itom.
Paagto sa direksyon it Kalibo ro biktima ag posibleng nagapasueod eon sa trabaho ag gina-alegar nga ginsundan it mga suspek.
Pagkatapos sigon nga nag-overtake ro mga suspek hay ginbaril it backrider ro biktima sa anang ueo.
Padayun ro imbestigasyon it mga awtoridad kun sin-o ro sa likod it pagpamaril ag ro posibleng motibo sa krimen.
Ginatumod eon makaron kon nahagip it CCTV ro itsura it mga suspek.
Samtang, kadungan sa pag-agto ni Kalibo Mayor Juris Sucro sa crime scene, gin-anunsyo nana nga magapaguwa imaw it reward money para sa madasig nga pagkadakop sa mga suspek.
Ginduea man nana ro pagkabaeaka it publiko pinaagi sa paghambae nga isolated case eamang ro natabu nga shooting incident.
