KALIBO, Aklan—Ginhatud eon sa anang ulihing paeahuwayan ro ginbaril-patay nga kolektor it sangka motorcycle dealer nga si Julius Cuesta it Brgy. Tambak, New Washington.
Bandang alas-2:00 it hapon ko adlaw it Sabado hay gin-eubong eon si Julius kun sa siin maabu ro nagpatlod nga nakasuksok it puti nga eambong.
Hasta sa makaron hay indi gihapon mabaton it pamilya ni Julius ro natabu kana eabi pa ag owa pa nadakpan ro mga responsable sa krimen.
Suno kay Mrs. Vangie Cuesta, nanay ni Julius nga kabay nga magsurender eon ro mga suspek agud nga mataw-an it hustisya ro pagkamatay it anang unga.
Apela man nana sa gina alegar nga nobya it anang unga nga kunta hay magpakita kanda ukon sa mga otoridad para sa posibilidad nga makatau it dugang nga impormasyon sa ikasolbar it kaso.
Madumduman nga gintambangan ro biktima it motorcycle-riding suspects ko Marso 12 sa Barangay Caano, Kalibo samtang nagapa-agto sa trabaho.
Samtang, nagapadayun ro imbestigasyon it Kalibo Municipal Police Station sa kaso ni Julius.
apang nagpamalibad anay si PMaj. Willian Aguirre, deputy chief of police it Kalibo PNP Station nga magtau it dugang nga detalye sa daeagan it imbestigasyon bangud nga makabig nga sensitibo ro kaso.
Sa pihak kara may lead eon sanda nga ginasundan matapos nga mabuksan ro personal nga cellphone it biktima kun sa siin idtu nakita ro mga ulihing tawo nga anang naka istorya antes nga natabu ro krimen.
