Nakataeana nga magpatigayon it legislative inquiry ro committee on agriculture kaibahan ro iba pang komitiba it Sangguniang Panlalawigan agud nga istoryahan ro reklamo it pederasyon it hog raisers sa Aklan.
Tuyo it nasambit nga inquiry nga masolusyunan ro problema nga gindangop kanda it mga nagaalaga it sapat kasunod it barato nga baeak-ean it buhi nga baboy sa bilog nga probinsya.
Suno kay Aklan first district Nemesio Neron, chairman it committee on agriculture nga gindangop kana ro concern it mga manugbaboy matapos nga nakabilog ro mga raya it pederasyon ag set of officers kon siin sambilog imaw sa mga dinapit nga bisita sa ginpatigayon nga induction of officers sa ABL Sports Complex.
Ginpahayag dugang ni Neron nga valid ag may basehan ro reklamo it mga hog raisers bangud nga masyado sandang lugi sa presyo nga ginatanyag kanda agud nga mabakae ro andang mga alagang sapat.
Bukon suno kana it makatarungan ro 130 hasta 135 pesos nga presyuhan it buhi nga baboy sa kamahaeon it feeds.
