Kalibo Aklan ——–Ginrekomenda ni Badio Punong Barangay Victor Crispino sa lokal nga gobyerno it Numancia nga uman nga maimbitahan ro representante it kompaniya nga planong magtukod it crematory sa nasambit nga lugar.
Raya hay kasunod it ginpalibot nga petition letter it mga residente it Barangay Badio kaibahan ro mga pumueuyu it kaiping nga Barangay it Poblacion ag Dongon East.
Suno kana nga mas mayad nga ro kompaniya ro mag-atubang sa public hearing agud nga ipaathag sa mga pumueuyu ro gina-proponer nga pagbutang it crematorium sa nasambit nga lugar.
Kaibahan man sa gin-imbitahan hay ro natungdan nga opisina ag komitiba it SB.
Ginpahayag ni Kapitan Crispino nga nauna eon imaw nga gin-imbitahan sa session it Sangguniang Bayan kaibahan ro anang kagawad nga in-charge sa committee on health pinaagi sa zoom meeting sa ginabaeay nga ordinansa kun sa siin majority it mga SB members hay pabor sa nasambit nga proposisyon.
Kaeakip sa ginakabaeak-an it mga residente hay ro asu nga igabuga nga posibleng makahalit sa andang ikamayad nga eawas.
Sa makaron hay sigidas eon ro pagtambak sa gina-obra nga daean paagto sa lugar nga pagabutangan it crematorium sa likod it sementeryo nga ginatantiya nga mga 200 meters halin sa mga panimaeay.
Samtang, ginhinyu man ni kapitan crispino nga ibutang sa Memorandum of Agreement (MOA) sa tunga it LGU-Numancia ag kompaniya nga engkaso nga makaangkon it maeain nga epekto ro operasyon it igatukod nga crematorium hay otomatiko raya nga igapasarado.
Ro design sigon it crematorium hay matsa mobile agud nga maeumo nga ma-dismantle ag mataas ro chimney ukon ginabugahan it asu.
