BALITA Espesyal– Sangka Chinese manufacturing company ro ginabatikos makaron it Chinese netizens bangud nga ginsisante nanda ro sangka empleyado nga owa nasarangan nga tapuson ro five kilometer race!
Ginpabayad it korte ro kompanya bangud sa illegal termination.
Ko nagtaliwan nga dag-on, nag-apply sa sangka mechanical parts factory sa Suzhou City, Jiangsu Province si Mr. Liu.
Kat makapasa sa serye it mga practical tests kapareho it electrical welding ag gas cutting, nabaton eon imaw sa kompanya bilang probationary employee.
Agud nga maka umpisa it anang trabaho nga maintenance personnel, ginkinahangean nana nga magpa-medical examination.
Bukon it sabat it kompanya ro medical exam rason nga naghalin sa anang boesa ro ginbayad kara.
Matapos itau ro anang medical exam sa HR, ro bilog nga pageaum ni Liu hay magadere-deretso eon ro anang pagtrabaho sa kompanya.
Apang pilang adlaw pa eang, gin abisuhan imaw it company executive nga kinahangean nana nga magpasakop sa sangka mandatory long-distance running test.
Ginpaandaman imaw it anang mga kaibahan nga bukon it hinangae ag dapat nga seryosohon ro running test bangud nga kon indi nana matapos sa sueod it 30 minutes ro five kilometer run, pagapahalinon imaw it kompanya.
Ko adlaw it running test ni Liu, 40 degrees Celsius ro temperatura sa Jiangsu Province.
Suno kay Liu, nakakadaeagan pa eamang imaw it 800 meters hay nakabatyag eon imaw it mga sintomas it heat stroke.
Bangud kara, owa eon nana gintapos ro race ag nagbalik eon imaw sa andang opisina.
Sumunod nga adlaw, nakabaton eon imaw it memo nga owa imaw nakapasa sa anang probation period ag ulihing adlaw eon nana sa kompanya.
Nagpasaka it kasong wrongful termination si Liu kontra sa anang kompanya.
Ro reklamo nana sa korte, owa imaw ginhambaean ko hiring process pa eamang nga required gali imaw nga magdaeagan it limang kilometro para mabaton sa trabaho.
Depensa man it kompanya, tradisyon eon nanda nga padaeaganon sa sangka five kilometer race ro andang mga bag-ong empleyado para testingan kon may una baea ro mga raya nga ‘hard working spirit’.
Ginpanindugan it Suzhou City Intermediate People’s Court si Liu ag nagpabor sanda nga illegal termination ro gin-obra it kompanya.
Bangud kara, ginsentensiyahan it korte ro kompanya nga bayaran it 7,000 Yuan (katumbas it P53,000) si Liu bilang compensation.
