KALIBO, Aklan—Kompleto eon ro plano para sa igatukod nga 5-storey building nga Kalibo public market.
Suno kay Kalibo mayor Emerson Lachica nga sa makaron hay ginahueat eon lang nanda ro pondo sa pagbakae it eugta nga nahamtang sa Brgy. Andagao nga pagamiton nga relocation site it mga vendors.
Nakaangkon eamang suno kana it delay bangud sa pagtama it nagapadayun nga covid-19 pandemic.
Ro pondo suno kana para sa relocation site hay paga-utangon sa banko.
Ginaeauman nga antes matapos ro 2021 hay makasaylo eon ro mga vendors.
Gindugang pa ni mayor Lachica nga ginpasiguro nanda kabulig ro united architects of Aklan nga ro desinyo it building hay makasunod sa modernong paniempo eabi pa ag ginaduso eon man nanda ro plano nga maging siyudad ro banwa it Kalibo.
Ro ground floor suno kana hay paga-obrahon nga parking space, may mga pwesto para sa transient tenants, ag magataeana it lugar para sa mga nagabaligya it isda, karne, prutas, tinuea ag iba pa.
Ro inisyal nga pondo suno kana para kara hay naga-abot sa P300 million.
Madumduman nga portion it nasambit nga tindahan hay nasunog ko Setyembre 2019.
Samtang, plano man it LGU-Kalibo nga matapos nga mahuman ro construction it Kalibo public market, masunod nanda nga iga-upgrade ro Kalibo shopping center.
Ro relocation site nga pagabakantehon it mga vendors it tindahan hay pagagamiton man it mga maapektuhan nga stall owners sa shopping center.
