Uwa it nakit-an nga problema sa pre-flight inspection sa eroplano it Jeju Air pilang oras antes raya nga bumagbag sa South Korea nga ginkamatay it 179 katawo.
Ginpahayag ni CEO Kim Yi-bae nga uwa it abnormalidad nga nataeopangdan sa landing gear.
Ginaimbestigahan raya makaron kon may epekto ro bird strike ukon maeain nga panyempo ag kon ham-an it uwa naka-deploy ro landing gear it Boeing 737-800 kat bumagbag raya bandang alas-9:00 it agahon.
Akig ro mga himata it mga biktima bangud sa mahinay nga proseso it pagkakilan-ean sa mga bangkay.
Pilang bangkay pa eamang ro naitao sa pamilya samtang ro kaabuan hay nagahueat pa.
Suno kay Kim Yi-bae, nagasunod ro airline sa mga sueondanan sa kaeowasan ag haom raya nga pabaskugon pa ro maintenance ag safety measures.
Nagpromisa man imaw nga magatao it kompensasyon ag sabat sa gastos sa eobong it mga biktima.
Ginatun-an eon man it mga awtoridad ro black boxes it eroplano apang may samad ro sangka parte kara rason nga posibleng magbuhay ro imbestigasyon.
