KALIBO, Aklan—Dapat nga gamiton it mga ginikanan makarun ro opurtunidad agud mapabaskog pa ro koneksyon it andang pamilya samtang may ginapatuman nga community quarantine sa kaabuan nga mga lugar sa nasyon bangud sa gihapon sa epekto it coronavirus infectious disease ukon covid-19 pamdemic.
Suno kay Paul Adrian Pelayo , Administrative II it Aklan Population and Gender Office nga bukon it madali sa kada isaea ro presenteng sitwasyon bangud nga mabahoe ro epekto kara sa pangabuhian it kaabuan.
Maabu nga mga pumueuyu ro naduea-an it paeangitan-an ukon mga empleyado nga eubusan nga naduea-an it trabaho ag may una man nga owa it ideya kung ano ro matabo kanda pagkatapos it ginapatuman nga community quarantine.
Bangud man kara, limitado eamang ro Social interaction it mga inunga ag nabaeabagan bangud nga kabuhay sandang ginbawaean nga makaguwa sa sueod it panimeay.
Ginpahayag dugang nga dapat man nga limitahan eamang ro paggamit ukon pagtutok sa mga gadget.
Gamiton ro oras agud nga mapabatyag ro pagpalangga sa pamilya.
Indi dapat pagbinantayan it sangka nanay ukon tatay ro hueag it andang mga unga bangud malisod man para kanda nga indi makaguwa.
Mas mayad nga tun-an eamang ro mga raya it mga mapinuslanon nga bagay kapareho it mga hilikuton sa sueod it panimaeay.
Importante man suno pa kana nga likawan makarun nga tyempo ro pagka-depressed sa nagakatabo.
Mag-isip it mga pwede pang himuon agud maging manami pa ro relasyon it andang pamilya.
