KALIBO, Aklan—Ginpaathag ni Kalibo Sangguniang Bayan member Matt Aaron Guzman sa ginpatigayun nga session it konseho nga ginahueat eon lang nanda ro endorsement it tatlong ka mga barangay angot sa fare adjustment sa mga pampasaherong tricycle.
Partikular nga gintumod ni Guzman ro barangay Poblacion, Pook ag Tinigao samtang ro 13 nga iba pa hay nagpasugot nga indi makaangkon it paghueag sa pamasahe sa pihak it na-eksperyensyahan nga pagtinaas sa presyo it produktong petrolyo.
Madumduman nga nauna eon nga nagpatigayun it public hearing ro 16 nga kabarangayan it Kalibo para talakayon ro sistema it panueoktan sa pamasahe nga maging paborable sa parehong driver ag commuter.
Sa makaron, ginahueat eon lang it Chairman it Committee on Transporation ro pinal nga resulta it public hearing it tatlong natungdan nga barangay.
