KALIBO, Aklan—Nag-apela ro sangguniang bayan it Kalibo nga taw-an anay it tsansa ro ginaduso nga re-routing scheme it lokal nga gobyerno it Kalibo.
Raya ro ginpahayag ni SB member Matt Aaron Guzman, chairman it committee on transportation kadungan sa ginpatigayon nga hubeag protesta it mga drivers ag operators nga naga-kontra sa nasambit nga skema.
Nasayuran nga umpisa Pebrero 15 hasta 28 hay magapatigayon it dry run agud nga makahimo it pilang mga obserbasyon ag posibleng adjustments.
Mag-eowas sa mga drivers ag operators, pilang mga commuters man ro nagreklamo sa dry run bangud sa kakueangan it information dissemination.
Maskin sigon ro pilang mga drivers ag operators hay nakibot man sa ginpatuman nga patakaran bangud nga ro andang mga TODA presidents eamang ro nagpirma kara ag owa it nagakaigo kanda nga koordinasyon.
Samtang, ginhinyu ni Ronito Noble, sambilog sa mga tricycle drivers nga nakipaghinun-anon kanday Mayor Emerson Lachica sa anang mga kaibahan nga maging kalmado anay ag taw-an it tatlo hasta limang adlaw ro mga taga LGU-Kalibo nga ma-obserbahan ro resulta it dry run.
Ginpromisa man sigon kanda nga ro ordinansa hay pwede pang maamyendahan agud nga maging paborabli sa tanan.
Bangud kara, nagdesisyon ro mga nagaprotesta nga mag disperse ag magbalik sa andang pagbiyahe.
