KALIBO, Aklan—Ginsuhestiyon ni Punong Barangay Fevie Cipriano it Brgy. Caano, Kalibo nga punduhon anay it Dito Telecommunity Corporation ro konstruksyon sa ginapatindog nga tower sa andang barangay samtang owa pa natapos ro pagproseso sa mga ginakinahang-ean nga permit ag dokumento.
Raya hay kasunod it ginpaabot nga reklamo it pilang residente sa Municipal Zoning it lokal nga gobyerno it Kalibo.
Suno kay Kapitan Cipriano nga antes gin-umpisahan it DITO ro konstruksyon sa lugar hay nag-adto anay ro andang representante sa barangay para magpangayo it clearance kung siin nagpatigayun sanda it session para usisaon ro mga papeles ag titueo it eugta.
Owa man sigon it naging problema rason nga gin-isyuhan nanda it permit ro kompanya.
Apang, ko Marso 8 hay nag-adto ro mga tawuhan it Municipal Zoning para mag-imporma sa barangay nga may ginpaabot kanda nga reklamo angot sa proyekto.
Suno kay Kapitan Cipriano nga owa imaw it nabaton nga anumang reklamo halin sa anang kasimaryo rason nga nakibot imaw sa hitabo.
Sa pag-usisa, natukiban nga may kueang pang mga permit ro kompaniya rason nga ginlaygayan kara ro Engineer it proyekto nga punduhon anay ro konstruksyon samtang nagapadyaun pa ro pagproseso sa dokumento.
Nagpromisa man sigon ro kompanya nga andang iga-comply sa mas madali nga panyempo ro mga kinahang-ean nga dokumento para malikawan ro pilang ka mga problema.
Sa pihak nga parte, pabor man ro Municipal Planning Development Office (MPDO) nga punduhon anay it kompaniya ro ginapatigayun nga konstruskyon.
Raya ro ginpahayag ni Municipal Planning Coordinator Engr. Marlo Villanueva matapos kumpirmahon nga may nabaton sandang reklamo angot sa proyekto.
Dapat sigon nga magsunod ro natungdan nga kompaniya sa proseso ag kompletuhon anay ro tanan nga permit nga gintaeana ait gobyerno.
