KALIBO, Aklan—Posibleng ma-umpisahan eun sa first quarter it dag-on 2022 ro igapatindog nga revetment wall sa nagakatiphag nga eugta it mga residenteng maeapit sa suba nga sakop it Barangay Lapnag, Banga.
Suno kay Barangay Kapitan Rubin Seraspi it Brgy. Lapnag, Banga nga ko nagtaliwan nga mga dominggo hay nag-survey eun ro tawuhan it Department of Public Works and Highways (DPWH) agud nga makabilog it plano para sa igatukod nga proyekto sa lugar.
Dugang pa ni Kapitan Seraspi nga sandig sa andang gindihon nga resolusyon ro paghingyo kay Congressman Carlito Marquez agud nga mapatindugan it revetment wall ro lugar.
Sa last quarter makarun nga dag-on hay maga-umpisa eun sigon ro bidding samtang sa first quarter it 2022 hay maga-umpisa man ro konstruksiyon.
Nasayuran nga kapin sa 400 meters ro kahabaon it nasambit nga revetment wall ag may unang gintaeana nga 50 million pesos nga budget.
Sa pihak nga parte, ginklaro man kara nga nagahimo it tikang ro lokal nga gobyerno samtang owa pa naga-umpisa ro proyekto.
Ro gin-ubra eamang sigon nanda makarun hay ro pag-divert it tubi sa suba agud nga malikawan ro mabaskog nga pag-awas it tubi.
Aminado man si kapitan Seraspi nga engkasong may bagyo hay mabahoe sa gihapon ro tiyansa nga mag-eapaw ro tubi.
