Kalibo Aklan ——–Gintratar it Bombo Radyo ro reklamo it sangka konsumidor it Metro Kalibo Water District matapos nga lumobo ro anang bill sa tubi.
Suno sa tagreklamo nga si Mrs. Angelita Palma nga masobra sa 220 pesos eamang ro anang kaeabanan nga bill sa MKWD , apang sa pinaka-ulihi nga bill hay nakibot imaw bangud nga nag-abot sa masobra sa 6,300 pesos ro anang baeayran rason nga ginpakamayad nana nga magreklamo agud nga maklaruhan .
Ginpahayag dugang nga owa imaw masyadong nakatueugan bangud nga bukon it manami sa pamatyagan ro natabu .
Ginnsaysay nana nga ko 2014 hay nagsaylo sanda it baeay halin sa Brgy. Tambak New Washington paagto sa Sitio Dumlog sa nasambit man nga lugar.
Sa ginsayluhan nga baeay nga ginpatindog it anang magueang ag sa ginhalinan nga baeay, puro nakapangaean kana tanan ro mga water meter nga gintakod .
Ro anda sigon nga dating baeay hay gin-istaran it anang manghud, kun sa siin owa man sanda it komunikasyon rason nga owa nakasayod kon ginabayaran kara ro water bill kada buean.
Kunta suno kana bilang konsumidor hay gin abisuhan anay imaw nga may dating bill nga owa nabayaran .
Ro natabu sigon hay gin-combine it MKWD ro baeayran sa dati ag presenteng water meter .
Plano man sigon ni palma nga ro lumobong water bill hay pagabayaran apang amat-amat eamang sa sueod it pilang buean.
Gin-refer it Bombo Radyo ro problema sa MKWD nga insigida man nanda nga gin-aksyunan kun sa siin ginpa-agto ro complainant sa andang taeatapan.
