Padayon ro ginapatigayon sa makaron nga maid-id nga imbestigasyon it AD HOC Committee sa kontrata it ECOS Sanitary Landfill and Waste Management Corporation.
Sa pagpanguna ni Christine Hope Pagsuguiron, Chairman it AD HOC Committee it Malay, nagapadayon ro andang ginapatigayon nga imbestigasyon sa nasambit nga kontrata it pribadong kompaniya nga responsible sa paghakot it basura sa sanitary landfill sa mainland Malay.
Kun siin base sa initial findings it Office of regional prosecutor, nagaguwa nga ro PPP contract sa tunga it LGU-Malay ag ECOS Sanitary Landfill and Waste Management Corporation hay owa nagasakto sa Build-Operate-Transfer ukon BOT law ag sa municipal ordinance year 2011 nga nagaserbi bilang paggiya sa pagsueod it LGU sa sangka PPP kaibahan ro sangka private company.
Suno pa kay Pagsuguiron nga nakitaan man it overspending ro LGU-Malay, raya hay matapos sigon nga naglobo ro gingastos it gobyerno kat nagsueod sa sangka PPP agreement.
Nataeupangdan sigon nanda nga maabong nakabaehag sa PPP nga owa nasusunod ag pauman-uman ro pag-eabag it kompaniya sa kasugtanan.
Sa pihak nga parte, sa tyempo nga makaangkon eon ro komitiba it pinal nga findings ag recommendations hay anda rayang igasumite sa mga concern agencies para sa nagakaigong aksyon.
Ginaeauman man ni Pagsuguiron nga sa bulig ag kooperasyon it bilog nga komitiba hay matapos eon nanda ro andang rekomendasyon nga igasumite sa Sangguniang Bayan Malay.
Sa makaron, indi pa matumod it komitiba kun igakansela baea ukon pagapaduyon pa ro kontrata sa tunga it LGU-Malay ag ECOS Sanitary Landfill and Waste Management Corporation bangud sa kinahangean sa gihapon nanda nga magtipon it mga legal nga dokumento para sa nagakaigong pinal nga desisyon.
Madumduman nga nauna eon nga ginpatawag ro nasambit nga kompaniya kasunod sa naeksperyensyahan nga mabaho nga hugom maghalin sa centralize Material Recovery Facility (MRF).
