Maid-id nga gintun-an sa ginpatigayon nga AD HOC Committee hearing ro kontrata it ECOS Sanitary Landfill and Waste Management Corporation.
Ginpahayag ni Christine Hope Pagsuguiron, Chairman it AD HOC Committee it Malay nga nagapadayon ro andang ginapatigayon nga imbestigasyon sa nasambit nga kontrata it pribadong kompaniya nga responsible sa paghakot it basura sa sanitary landfill sa mainland Malay.
Kung siin base sa andang initial findings hay nagaguwa nga ro implementasyon it ECOS sa kontrata sa pamaagi it Public-Private Partnership PPP hay makabig nga contract of service eamang.
Nataeupangdan sigon nanda nga maabong nakabaehag sa PPP nga owa nasusunod ag pauman-uman ro pag-eabag it kompaniya sa kasugtanan.
Suno pa kay Pagsuguiron nga umpisa ko 2018 hasta 2023 hay owa it naging palya ro LGU-Malay sa pagpabayad sa ECOS Sanitary Landfill and Waste Management Corporation.
Masobra P409M eon sigon ro kabilugang ginbayad it LGU-Malay sa kompaniya para sa pag-maintain it sanitary landfill.
Rason nga dismayado gid sanda sa serbisyo nga ginapaabot kara sa mga pumueuyo.
Sa pihak nga parte, sa tyempo nga makaangkon eon ro komitiba it pinal nga findings ag recommendations hay anda rayang igasumite sa mga concern agencies para sa nagakaigong aksyon.
Madumduman nga nauna eon nga ginpatawag sa ginpatigayon nga session it Sangguniang Bayan it Malay rorepresentante it ECOS nga si Alex Carlo Magno kasunod sa naeksperyensyahan nga mabaho nga hugom maghalin sa centralize Material Recovery Facility (MRF). Sa makaron, nagapadayon ro ginapatigayon nga imbestigasyon it LGU-Malay ag AD HOC Committee angot sa nasambit nga isyu.
