Uman nga magataas ro kontribusyon it mga trabahador sa Philhealth ag Social Security System umpisa Enero it masunod nga dag-on.
Base sa laye, magataas it sang porsiyento ro kontribusyon sa SSS kadungan it pagbahoe it salary credit sa P30,000 pesos apang sabat raya it employer.
Kon ro suweldo hay P35,000 pesos kada buean, P4,200 pesos man ro magiging kontribusyon umpisa Enero kumpara sa presenteng P3,375.
Suno kay SSS president ag CEO Michael Regino, indi dapat magkabaeaka ro mga miyembro bangud nga may aspetong forced savings eon ro kontribusyon pag-abot it retirement.
Tunga sa porsiyento man ro dugang nga kontribusyon sa Philhealth halin sa presenteng ap-at nga porsiyento nga magiging 4.5% umpisa sa Enero.
Halimbawa, kun ro suweldo hay 10,000 pesos hay magataas it 450 ro hueog halin sa presenteng 400 pesos ag kun eampas sa 10,000 hasta below 80,000 pesos ro suweldo, 500 hasta 850 pesos man ro magiging dugang nga kontribusyon.
Ginplastar ni Philhealth Spokesperson Shirley Domingo ro mga mapuslan it mga miyembro sa dugang nga kontribusyon nga ginaeakipan it pagreview sa existing case rate agud nga ma-increase ro support value ag review sa z-benefits ag posibleng increase sa dialysis sessions.
