KALIBO, Aklan — Posibleng mabalewala eon ro kontrobersiyal nga utang it provincial government sa Development Bank of the Philippines (DBP) nga nagabalor it P1.53 billion.
Raya ro ginpahayag it petitioner nga si dating Sangguniang Panlalawigan member Rodson Mayor matapos nga baliskaton it korte ro naunang desisyon kara may kaangtanan sa pagpabor sa resolution no. 2018-962 it provincial board nga nagatau it pahanugut kay Governor Florencio Miraflores nga mag-utang it nasambit nga kantidad sa DBP.
Sa daywang panig nga desisyon , ginpaburan ni Hon. Ronald Exmundo, presiding judge it Regional Trial Court (RTC) Branch 4 ro motion for reconsideration ni Mayor nga balewalaon ro desisyon it korte ko Marso 21, 2019 nga nagabasura sa anang petisyon nga naga-kwestiyon sa resolusyon it SP bangud sa kawad-an it hurisdiksyon it korte sa kaso .
Matapos nga makitaan it merito ro mosyon it dating opisyal, nagpaguwa it mandu ro korte nga may petsang Hulyo 8, 2019 sa tanan nga mga respondents nga ginaeakipan it mga miyembro it provincial board sa pagpanguna ni Vice Governor Reynaldo Quimpo kamana man sa manager it DBP Aklan nga magsumite it andang sabat sa sueod it limang adlaw .
Ro nasambit sigon nga naging tikang it SP hay makabig nga pinaka-corrupt nga lehislasyon .
