KALIBO, Aklan — Eubusan eon nga gin pasara it lokal nga gobyerno it Malay ro kontrobersiyal nga West Cove Resort nga gina panag iyahan it negosyanteng si Crisostomo “Cris” Aquino.
Gin pangunahan ni Executive Assistant to the Mayor Rowen Aguirre ro pagserbe it closure order bangud naga operate sigon raya nga owa it business ag building permits.
Apang, gin pamilit ni Aquino nga mabuhay eon nga tiempo nga nag apply sanda it nasambitang mga dokumento apang, bangud sa pulitika hay owa sanda nataw-an kara.
Nakibot sigon sanda bangud owa gin abisuhan nga iga pasara makaron nga adlaw ro anang resort.
Haeos matueo man ro euha nga gin pahayag kara nga naeouy imaw sa haeos 60 nga empleyado it resort.
Nagpanawagan man imaw nga maging patas sa pagpatuman it kasuguan sa isla.
Nauna kara, nagpahayag it kabaeaka si Aquino nga naga pameligro nga maduea ro anang resort bangud sa gina patigayun nga demolisyon makaron sa mga illegal structures sa Boracay.
Gin pamilit pa kara nga naka-apela sa gihapon sa Office of the President ro pagkansela sa andang Forest Land Use Agreement for Tourism Purposes (FlagT) matapos nga owa eon gin baton it Department of Environment and Natural Resources (DENR) central office ro andang bayad para sa performance bond.
Kawad-an sigon raya it due process bangud sa owa sanda gin abisuhan.
Sambilog sigon sa mga gina turong ground sa pagkansela it andang FlagT hay ro gina himong over development sa lugar.
Nagpanindugan si Aquino nga ro gin taong FlagT kanda hay base sa PD 1064 nga gin isyu it DENR ku December 23, 2009 ag may gahum sa sueod it 25 anyos.
