(Update) KALIBO, Aklan— Ginbo-oe eon it Department of Environment and Natural Resources (DENR) ro kordon ag pwede eon nga mapaligsan ro dagat sa Station 1 sa isla it Boracay.
Raya hay kasunod it pagkadiskubre sa “controversial diaper” nga gin-eubong it sangka dumueuong nga turista nga ginasugid nga Chinese national.
Base sa ginpaguwa nga report it Environmental Management Bureau (EMB) Region 6, eowas eon nga mapaligsan ro nasambit nga baybayon base sa ginpatigayon nga coliform test sa water samples nga nagapakitang una eon raya sa eowas nga lebel.
Samtang, nag-apela man si Police Major Jess Baylon, hepe it Malay Police Station sa mga residente, stakeholders ag turista nga makipagbueuligan ro mga raya sa pulisya pinaagi sa pagreport eagi kanda it mga insidente nga nagakatabu sa palibot kapareho it nag-viral nga video kun sa siin eakot ro mga dumueuong nga turista.
Suno sa opisyal, may environmental laws nga ginapatuman ro lokal nga gobyerno it Malay nga dapat sundon it tanan ag agud nga maaresto eagi ro mga naga-eabag kara.
