KALIBO, Aklan — Sangka Korean firm ro nagtanyag it bulig sa lokal nga gobyerno it Kalibo agud nga mausuyan it solusyon nga indi magatambak ro basura sa open dump site sa Barangay Bakhaw Sur, Kalibo.
Suno kay Jay-ar Arante, head it media affairs it LGU Kalibo nga sa makaron hay napirmahan eon ro letter of intent sa tunga ni Mayor Juris Sucro ag ko Smart Power it South Korea.
Eksperto ro nasambit nga kompaniya sa pag-obra it state-of-the-art nga incinerators nga imaw ro nagasunog sa mga basura ag ro init nga matipon hay pagagamiton bilang alternatibong source it energy.
Ginpahayag ni Arante nga bukon eamang it Kalibo ro posibleng makapanipueos sa proyekto kundi ro kaiping nga mga banwa.
Madumduman nga nauna eon nga ginpaandaman ro banwa it Kalibo it National Solid Waste Management Commission nga i-convert ro andang dumpsite sa sanitary landfill agud nga makasabat sa Ecological Solid Waste Management Act of 2000.
Kasunod it pagbisita ni Mayor Sucro sa Korea ko nagtaliwan nga buean it Mayo hay nag-agto man sa Kalibo ro mga represantante it kompaniya ag nagpatigayon it ocular inspection sa dumpsite .
Ginpahayag dugang nga maabu nga mga basura ro ginakinahangean it Korean technology agud nga maka-produce it kuryente rason nga posibleng magabo-oe pa it basura halin sa kaiping nga mga lugar.
Ginaeauman nga maumpisahan eon ro proyekto sa mas madali nga paniempo.
