KALIBO, Aklan — Uman eonman nga nakapangbiktima ro mga miyembro it Salisi Gang matapos madaeasa ro wallet nga may sueod nga kwarta ag mga importanteng dokumento it sangka turistang Koreano samtang nagalibot sa sangka mall sa Brgy. Balabag, Boracay.
Nakilaea ro biktima nga si Eutteum Kim, 34, ag presenteng naga estar sa Barangay Manocmanoc, Boracay.
Nadaeasa sa biktima ro anang wallet nga may sueod nga sa P17,000 ag mga importanteng dokumento.
Sa report it Boracay Tourist Assistance Center (BTAC), samtang naga libot sa sueod it shopping mall hay gin sinundan sigon ro estranghero it daywang eaeaki ag tatlong babaye.
Nakibot eob lang imaw kat matukiban nga naduea ro anang wallet nga sa sueod it anang backpack.
Sa bo-oe it closed circuit television camera (CCTV) it nasambitang establisemyento, nakita ro sangka eaeaki nga nakapuea it t-shirt nga nag eapit sa biktima ag binuksan ro anang backpack kasunod it pagbo-oe sa anang wallet.
Nagapadayun pa ro imbestigasyon it kapulisan sa nasambitang insidente eabi eon ro pagtumod sa pagkakilanean it mga suspek.
