KALIBO, Aklan— Patay eon nga nakaabot sa ospital ro sangka Korean national matapos maeomos sa baybayong sakop it Station 3, Barangay Manoc-manoc sa isla it Boracay.
Ginkilaea ro biktimang si Jeyoung Kim, 31, ag presenteng nagabakasyon eamang sa sikat nga isla.
Base sa inisyal nga imbestigasyon it Malay Police Station, nataeopangdan sigon it sangka Russian national nga si Elena Urbanik nga naga-eotaw sa tubi ro biktima, may tatlong metro ro kaeayuon halin kana apang uwa sigon nana raya pag-intindiha sa pag-eaum nga nagaeangoy eamang ro turista.
Pilang minuto ro nakataliwan hay uwa gihapon raya nagahueag rason nga naalarma eon imaw ag insigidang nagpangayo it bulig.
May kaangtanan kara, madasig nga nagpaeapit ro mga tawo kon siin sangka Swedish national pa ro naghana nga magtao it Cardiopulmonary resuscitation (CPR) sa biktima antes nga gindaea sa ospital.
Nagapadayon pa ro imbestigasyon it pulisya sa nasambitang insidente.
