Kailangan munang makakuha ng pahintulot mula sa korte si dating DPWH Secretary Manuel Bonoan bago makabiyahe palabas ng bansa matapos maglabas ng precautionary hold departure order ang Manila Regional Trial Court kaugnay ng umano’y anomalya sa flood control projects.
Ayon kay Justice Secretary Fredderick Vida, ang korte ang magpapasya sa anumang kahilingan sa paglalakbay. Nauna nang naghain si Bonoan ng counter-affidavit sa kasong plunder at iginiit na may pahintulot siyang bumiyahe para dalawin ang asawang sasailalim sa operasyon sa Estados Unidos.
Binanggit ng DOJ na maaari siyang ituring na flight risk dahil sa hindi umano pagsunod sa naunang travel permit. Kabilang sa mga co-accused sa kaso si Jinggoy Estrada at iba pang dating opisyal ng DPWH.
