Ginbaligya it aktres nga si Kris Bernal ro ginbakae nanda nga ticket it anang asawa nga si Perry Choi para sa concert ni Adele matapos nga owa sanda mataw-an it UK visa nga requirement sa pagsueod sa nasambit nga nasyon.
Suno kay Kris, naunsiyami ro plano nanda nga pag-eupad paadto it United Kingdom para kunta matan-aw it personal ro sikat nga singer.
Nasayuran nga nabakae ni Kris ro Golden Circle East ticket kato pang Oktobre 2021 sa Hyde Park London nga pre-selling online kung siin, ro sangka ticket hay nagabalor it 23,000 pesos.
Sa instagram post, ginpahayag it aktres nga owa sanda it choice kundi ibaligya eon lang ro andang ticket kung siin plano kunta nanda nga itaeana para sa andang honeymoon, paglibot sa UK ag Europe sa sueod it sang buean kung owa naunsyami ro andang pagbyahe abroad.
