NUMANCIA, Aklan—Posibleng magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ro sangka kristo sa bueangan matapos nga madakpan sa ginkasa nga drug buy-bust operation nga ginpangunahan it Numancia Municipal Police Station kabulig ro Provincial Drug Enforcement Unit ukon PDEU Aklan sa Brgy. Aliputos, Numancia.
Ginkilaea ro suspek nga si Agusto De Luis Santos, 42-anyos ag residente it nasambit nga lugar kon sa siin nabak-ean raya it sangka sachet it suspected shabu kabaylo it buy-bust money nga P6,500 pesos.
Sa pihak kara, ginpanindugan it suspek nga uwa imaw nagaintra sa nasambit nga illegal nga aktibidad ag bukon it ana ro narekober nga ginadudahan nga droga.
Ginsaysay nana nga halin imaw sa bueangan ag uwa man it naiuli nga kwarta bangud sa pyerde man ro anang amo.
Dugang pa nana nga samtang naga-scroll sa anang facebook account hay gulpi eamang nga may umabot nga mga kaeaeakin-an ag insigida imaw nga gindumog ag ginpusasan.
Ulihi eon sigon kuno imaw nakatagumpaaw nga gina buy-bust eon raya apang hugot ro anang panindugan nga uwa imaw nagaintra sa pagbaligya it illegal nga droga.
Sa makaron, si Agusto hay presenteng nakakulong sa lock-up cell it Numancia Municipal Police Station para sa nagakaigong disposisyon.
