Sangka kuring sa Liverpool, England ro nominado sa National Cat Award matapos kara nga eowason ro kabuhi it anang amo nga may diabetes.
Sang gabi-i hay naduea-an it alintro sa anang kuwarto ro 51-anyos nga si Amanda Jameson bangud sa low blood sugar.
Nakita raya it anang alagang kuring nga si Willow ag insigidang gin alerto it kuring ro asawa ni Amanda nga si Ray Sherwood pinaagi sa pag-angkit sa anang siki.
Suno kay Ray, nakatueog imaw samtang nga sa atubang it TV kat mabugtaw nga gina angkit ni Willow ro anang siki.
Nagapabalik-balik ro kuring sa anang ginapungkuan paagto sa hagdan para ipabutyag kara nga sundan imaw sa second floor it baeay.
Kat ginsundan nana ro kuring sa andang kwarto, dikara nana nakita ro asawa nga nagahamyangon sa saeog.
Bangud kara, naagapan ro kabuhi ni Amanda.
Sa kabaganihan nga ginpakita ni Willow, sambilog imaw sa finalists it National Cat Awards.
Ro National Cat Awards hay contest nga nagatau it pasidungog sa mga tumaeagsahon nga kuring para sa bilog nga United Kingdom.
Gin-umpisahan raya it charity organization nga Cats Protection.
Sambilog si Willow sa limang finalist para sa Hero Cat category.
Ro ibang categories hay Furr-ever Friends, Most Caring Cat ag Outstanding Rescue Cat.
Pagahiwaton ro awards ceremony sa Agosto 2023 sa Savoy Hotel sa London.
