KALIBO, Aklan — Arestado it gintingob nga pwersa it mga operatiba it Malay Police Station Special Drug Enforcement Unit, 2nd Aklan PMFC Intel ag PDEA-Aklan ro suspek nga kusinero nga nagaduso it iligal nga droga sa ginpatigayong drug buy-bust operation alas-12:15, Lunes it kaaganhon sa Barangay Manocmanoc sa isla it Boracay.
Ginkilaea ro suspek nga si Mark Andrew Panganiban, alyas ‘Boknoy’, 28, tumandok it Quezon City ag presenteng naga-istar sa Sitio Lugutan, Manocmanoc, Boracay.
Base sa report, nabak-ean ro suspek it daywang transparent plastic sachet it ginadudahang shabu kabaylo it P1,600 sa nagpakuno-kunong poseur buyer ag kat magpositibo ro transaksyon hay gilayon nga gin-aresto ro suspek nga kusinero.
Narekober sa posisyon it suspek ro dugang nga tatlo pang sachet it iligal nga droga.
Nagapangatubang si Panganiban sa kasong pag-eabag sa RA 9165 ukon Comprehensive Dangerous Drugs Act of 2002.
