Kylie Verzosa ag Jake Cuenca, owa pa uman nga nagka-istorya matapos nga magbueag

“Pahuway anay ro tagipusuon.”

Raya ro ginpahayag ni Kylie Verzosa matapos sanda nga magbueag it aktor nga si Jake Cuenca.

Sa vlog nga ginpagguwa it batikang komedyante ag talent manager nga si Ogie Diaz ko Lunes it agahon, ginpakigbahin ni Kylie nga trabaho anay ro anang pagakasakuan makaron.

Pag-aku ni Kylie, owa pa sanda uman nga nagka-istorya ni Jake.

Madumduman nga mainit nga gin-istoryahan nga bueag eon ro daywa kat mag-tweet ro aktres it “Broken.”

Mas pang nag-init ro isyu kat owa napunggan it aktres nga mapaeuha sa sangka segment it noontime show kat maistoryahan ro may kaangtanan sa breakup it sambilog sa mga contestant.