KALIBO, Aklan—Hugut nga ginpamalibaran ni dating Kalibo Mayor Raymar Rebaldo ro gina-alegar nga pag-tandem kara kay Kalibo Mayor Emerson Lachica sa paeaabuton nga eleksyon.
Suno kana nga owa it kamatuoran ro nasambit nga balita nga magiging bise alkalde imaw ni lachica bangud nga hasta sa makaron hay owa pa it may nakapaeapit kana angot sa nasambit nga plano.
Mag-eowas kara, nagapabilin suno kana ro anang suporta kay Aklan Governor Florencio Miraflores.
Maskin sigon imaw hay nangawa kon sin-o ro source it nasambit nga balita.
Sa pihak kara, aminado si Rebaldo nga nagapangunsiho eon imaw sa publiko ag sa mga kaalyado para sa posibilidad nga uman nga pagbalik sa pulitika.
Nakadepende sigon ro anang magiging pinal nga desisyon kay Governor Miraflores, kun sa siin raya sigon ro nagtau it kabuhi sa anang political career ag naghubog nga maging mayad nga public servant.
Nasayuran nga naging board member man si Rebaldo antes nga nagbalik sa anang pribadong kabuhi.
