(Update) KALIBO, Aklan—Desidido nga magpasaka it kaso ro biktimang si Edmar Prado, 35-anyos kontra sa suspek nga si Danilo Panganonong, 55-anyos nga imaw ro responsable sa pagbuno kana sa buli ag si Lorenzo Inocencio, 52-anyos nga nagsapote kana ag parehong mga residente it Brgy. Aranas, Balete.
Suno kay Police Senior Master Sargent Francisco Sison it Balete Police Station, maghimata ro tatlo kon sa siin ginapatihan nga land dispute ro ginhalinan it andang banggianay.
Naka-hospital arrest sigon makaron sa Aklan provincial hospital si Panganonong matapos nga nalastruhan sa alima it daea mismo nana nga siyaw-duko kamana man si Inocencio hay nakakulong makaron sa nasambit nga taeatapan it pulisya.
Samtang, si Prado hay insigida man nga ginrefer sa outpatient department it nasambit nga baeay paboengan matapos nga gin-eapatan it nagakaigong disposisyon.
Madumduman nga antes nga ginbuno ni Panganonong si Prado hay ginsabyahan anay nana raya it damog nga nagresulta sa andang diskusyon hasta nga ko ulihi imbes nga mag-awat si Inocencio hay ana pang ginsapote ro nasambit nga biktima.
