KALIBO, Aklan—Nagkasa it operasyon ro Office of the Municipal Agriculturist kabulig ro New Washington PNP para madakpan ro mga illegal nga nagabaligya it pilang ka mga isda kapareho it Sardinas, herring ag Mackerel fry ukon mas kilaea sa tawag nga “Lupoy” ukon “Laplap” sa tindahan kung siin ginabagsak ro mga raya.
Sangka eaeaking trader nga residente it Brgy. Ochando, New Washington ro nadakpan samtang naga-deliver it mga nasambitang isda sa bahin it Brgy. Polo sa nasambitang banwa.
Ro natungdan nga persona hay gin-aresto bangud sa pag-eabag sa Section 2 it Article 12 it Municipal Fishery Ordinance 2010-01 ukon ro Prohibition of Catching, Selling, and Possesion of Sardines, Herring, and Mackerel fry ukon “Laplap”.
Narekober sa posisyon ag kontrol it nasambitang indibidwal ro tatlong box it laplap kung siin gilayon man rayang gindaea sa Aklan Rehabilitation Center (ARC) ag iba pang NGOs kapareho it Missionaries of Charity and Daughters of Charity.
May kaangtanan kara, ginpadumdum man it mga otoridad nga ro pagbaligya it “Laplap” hay hugut nga ginapagbawae.
Ro mga madakpan hay posibleng magpangatubang it multa nga kapin sa 1,500 pesos sa unang pag-eabag samtang 2,000 pesos mat-a sa pangaywang pag-eabag ag 2, 500 sa third ag final offense kaibahan eon ro pagkumpiska sa isda ag iba pang fishing paraphernalia.
