KALIBO, Aklan — Ginkalipay ni dating Aklan 1st District Congressman Carlito Marquez nga naging laye eon ro anang ginduso nga Republic Act No. 12290, nga nagatukod it sa Virology Institute of the Philippines ukon VIP bilang nagapangunang research institution it nasyon nga magatutok sa pagtuon it mga virus ag viral diseases.
Ro nasambit nga laye hay ginpirmahan ni Pangueong Ferdinand Marcos Jr., ko Setyembre 12 it makaron nga dag-on.// suno kana nga tuyo it laye nga mapabaskog ro scientific capacity it Pilipinas para mas maging haum kontra sa pandemya, agricultural outbreaks, ag iba pang paeag sa ikamayad nga eawas.
Ginamanduan raya nga magpatigayon it pagtuon ag development it diagnostics, bakuna, ag therapeutic solutions kontra sa nagkaeain-eain nga klase it virus nga nakakaapekto sa tawo, kasapatan, ag mga pananum.
Importante sigon raya bangud nga kaibahan ro Pilipinas sa mga nasyong eubus nga naapektuhan it nagtaliwan nga mga pandemya kapareho it COVID-19, ag kinahangean it mas mabaskog nga ikasarang para maagapan ro mga masunod nga paeag.
Ro VIP hay pagadumaeahan it sangka direktor, nga magasumite it mga report angot sa mga resulta it research ag development sa VIP Board, nga pagadumaeahan it sekretaryo it Department of Science and Technology ukon DOST, ag co-chair ro mga sekretaryo it Department of Health ag Department of Agriculture.
dating Aklan 1st District Congressman Carlito Marquez
